《有屋頂嘅侘寂風屋子》大圍愉景花園

Uchi Design
4月14日
讀畢需時 4 分鐘

今日小編為你介紹位於 #沙田 #大圍嘅屋子，實用面積有成688呎，2房半屋子。今次呢間屋子達成度好高，同屋主多次切磋後整體設計仍然保留到，幾乎同我地交出去嘅第一手效果圖一樣！感謝屋主夫婦，放心將全屋交俾我地規劃、設計、選材，多得你地賞識又敢納用我地提議！

屋主講究生活品味，追求屋內設計和諧度，希望屋內實用與設計要達至平衡，實際得黎要有細緻度！

小編覺得其中有幾個突破位：超人性化完美玄關落塵區、廚房屋頂型假天花、主人房仿頭枕床頭板及窗簾擋板、姐姐房與衣帽間共用

#超人性化玄關落塵區 #將日式整個落塵區配套帶入屋

屋內採光極好，唔想俾牆身限制咗光所到之處，於屋內規劃上盡量保持開揚度。唯獨玄關位大門能夠望穿睡房，想避開傳統風水之說，因此以屏風作遮擋。於設計上為免門口過份陰暗及壓迫感，屏風以藝術玻璃作修飾，亦留有空隙位通風。

正正因為呢寸屏風，令玄關上嘅安排更顯成熟。設計師考慮到客廳過於寬闊，梳化距離電視位甚遠，建議將日式房子嘅「落塵區配套」帶入屋中。於玄關位有條理地安排擺放鎖匙銀包位、鞋櫃，以及儲物室，可掛起日常外出服、擺放雨具、常用生活用品、泊低車仔（滑板車、單車、買餸車、其他等）。落塵區與生活空間分隔開，減低外出物/細菌帶入生活空間。經歷疫情後，我地明白到家居衛生好重要！

💡 #屋點子

傳統上落塵區功用，於玄關位置分隔開由街上帶回家中嘅所有髒污，

而時至今日，日本玄關設計變得更人性化及個性化，分為脫鞋區、擺放鞋／外出物區域，甚至會有洗手臺位等，按屋主需求而制定呢吋空間嘅安排。

例如：露營愛好者會係玄關，擺放所有常用露營工具等。

概念就好似西方國家會將一d經常要外出使用嘅工具或重型機器擺係車房一樣。

#小孩友善設計

屋主夫婦於會議時多次提及「小朋友鍾意走黎走去，驚撞親頭！」，希望有更多走動空間之餘，邊邊角角要做圓！設計師索性將流線、波浪、圓弧等元素放入屋。全屋傢俱邊角除咗使用大圓角修邊外，其中電視櫃與玄關屏風為咗減少尖角同視覺上突兀，兩個parts之間以「順延波浪設計」作碰口位，嘅連貫又於視覺上變得柔和，手感又smooth。

考慮到小朋友需要大量走動空間，係動線規劃上拎走咗飯廳嘅梗檯安排，改為吧檯用餐為主。

#2合1姐姐房與衣帽間分半 #不突兀又具功能性

原側已經係超實用嘅3房單位，現改為2房半。將其中一間房如俄羅斯方塊般「立體分半」，劈出姐姐房及主人衣帽/儲物間。房內本身有窗台，以櫃身及擋板完美將窗台分隔兩房，互相不打擾。呢個「半共享窗台」就好似天井位咁，供兩個空間透涼透光又通風。

姐姐房一直路行到最入，爬上上層休息，床側有開口位透涼，下層亦係佢嘅收納天地。而另一邊則係主人房嘅巨型衣櫃/儲物櫃，原先姐姐床下位置仍然可以儲物或行去窗台邊。

於整體風格設計用色上偏向侘寂風，配色選用偏柔和木系、大地色，型造沙漠氛圍，運用不同深淺度、紋理等飾面，令全屋感覺好整體及和諧，俾人一種好低調但不失高尚嘅感覺。

#屋子型天窗廚房

廚房假天花作用就係安裝燈具、收起管線遮醜，又要方便維修。普偏做法以一塊塊白鋁板放係鋁架上。而考慮到屋主希望全屋感覺一緻，設計師大膽提議以木殼修飾天花。屋內設計都係偏木色調，因此設計師採用「木屋屋頂」作假天花，以龍骨及幾塊斜板打造，每一個骨架零件都可以拆開方便維修。燈具剛好裝係頂端，向上望就好似一個「真天窗」咁😍